2 John
1ខ្ញុំជាចាស់ទុំជូនចំពោះលោកស្រីដែលព្រះជាម្ចាស់បានជ្រើសរើសនិងកូនៗរបស់លោកស្រីដែលខ្ញុំស្រលាញ់នៅក្នុងសេចក្ដីពិតហើយមិនមែនតែខ្ញុំប៉ុណ្ណោះទេគឺអស់អ្នកដែលស្គាល់សេចក្ដីពិតដែរ 2ដ្បិតសេចក្ដីពិតនោះនៅក្នុងយើងហើយនឹងនៅជាមួយយើងអស់កល្បជានិច្ចផង។ 3ព្រះគុណសេចក្ដីមេត្ដាករុណានិងសេចក្ដីសុខសាន្ដពីព្រះជាម្ចាស់ជាព្រះវរបិតានិងពីព្រះយេស៊ូគ្រិស្ដជាព្រះរាជបុត្រារបស់ព្រះអង្គនឹងស្ថិតជាមួយយើងនៅក្នុងសេចក្ដីពិតនិងសេចក្ដីស្រលាញ់។ 4ខ្ញុំត្រេកអរខ្លាំងណាស់ដោយបានឃើញកូនៗមួយចំនួនរបស់លោកស្រីប្រព្រឹត្ដតាមសេចក្ដីពិតស្របតាមបញ្ញត្ដិដែលយើងបានទទួលពីព្រះវរបិតាមក។ 5ឥឡូវនេះលោកស្រីអើយ! ខ្ញុំសុំលោកស្រីថាយើងត្រូវស្រលាញ់គ្នាទៅវិញទៅមក។ ខ្ញុំមិនមែនសរសេរបញ្ញត្ដិមួយថ្មីសម្រាប់លោកស្រីទេប៉ុន្ដែជាបញ្ញត្ដិដែលយើងមានតាំងពីដើមដំបូងមក។ 6នេះហើយជាសេចក្ដីស្រលាញ់គឺយើងត្រូវប្រព្រឹត្ដតាមបញ្ញត្ដិរបស់ព្រះអង្គហើយនេះជាបញ្ញត្ដិគឺអ្នករាល់គ្នាត្រូវរស់នៅក្នុងសេចក្ដីស្រលាញ់ដូចដែលអ្នករាល់គ្នាបានឮតាំងពីដើមដំបូងមក 7ព្រោះមានជនបោកប្រាស់ជាច្រើនបានចេញទៅក្នុងលោកិយនេះជាពួកអ្នកដែលមិនព្រមទទួលស្គាល់ថាព្រះយេស៊ូគ្រិស្ដបានយាងមកក្នុងសាច់ឈាមទេគឺអ្នកនោះហើយជាជនបោកប្រាស់ហើយជាអ្នកប្រឆាំងព្រះគ្រិស្ដ។ 8ចូរអ្នករាល់គ្នាប្រយ័ត្នដើម្បីកុំឲ្យអ្នករាល់គ្នាបាត់បង់អ្វីដែលយើងបានធ្វើនោះគឺឲ្យទទួលបានរង្វាន់ដ៏ពេញលេញវិញ។ 9អស់អ្នកដែលទៅហួសហើយមិននៅជាប់នឹងសេចក្ដីបង្រៀនរបស់ព្រះគ្រិស្ដនោះគ្មានព្រះជាម្ចាស់ទេប៉ុន្ដែអ្នកណាដែលនៅជាប់នឹងសេចក្ដីបង្រៀនរបស់ព្រះគ្រិស្ដអ្នកនោះមានទាំងព្រះវរបិតានិងព្រះរាជបុត្រា។ 10បើអ្នកណាមកឯអ្នករាល់គ្នាប៉ុន្ដែមិនបាននាំសេចក្ដីបង្រៀននេះមកទេចូរកុំទទួលគេមកក្នុងផ្ទះឬជម្រាបសួរគេឡើយ 11ដ្បិតអ្នកណាដែលជម្រាបសួរគេអ្នកនោះក៏រួមចំណែកក្នុងអំពើអាក្រក់របស់គេដែរ។ 12ខ្ញុំមានសេចក្ដីជាច្រើនដែលត្រូវសរសេរមកអ្នករាល់គ្នាប៉ុន្ដែខ្ញុំមិនចង់សរសេរដោយក្រដាសនិងទឹកខ្មៅនេះទេដ្បិតខ្ញុំសង្ឃឹមថានឹងមកជួបអ្នករាល់គ្នាហើយនិយាយដោយផ្ទាល់មាត់វិញដើម្បីឲ្យអំណររបស់យើងបានពេញបរិបូរ។ 13កូនចៅបងស្រីរបស់លោកស្រីដែលព្រះជាម្ចាស់បានជ្រើសរើសនោះក៏ជម្រាបសួរមកលោកស្រីដែរ។
Copyright information for
KhmKCB